सृजनाचा मोहोर....
मधुकोश संकुलातील सांस्कृतिक वातावरण आणि पर्यावरण हर्षदायी आहे. दिनभर वृक्ष फुलझाडे दृष्टीस आनंद देतात कधी हवाहवासा वारा तर कधी हलकीशी झुळूक व त्यावर बागडणारे पक्षी आणि खारुताई यांचे मंजुळ आवाज कान तृप्त करतात. दुडूदुडू धावणारी बाल गोपाळ मंडळी, त्यांच्या बुटांचा गमीतीदार आवाज , सायकल शिकणं ,थोड्या मोठ्या मुलां मुलींचे नाविन्यपूर्ण खेळ ,धावा धावी- लपाछपी ,कधी मांजर आणि लाडका कुत्रा या पाळीव प्राण्याशी मुलांचा संवाद. असा आनंदाचा ठेवा आबाल वृद्ध एकंदरीत पहाटे ते सायंकाळ पर्यंत सर्वच रहिवासी येथे लुटत असतात. असं दिवसभर नादमय वातावरण निसर्गाविषयीची कृतज्ञता आपल्या मनात जागी करतात. हे सार वैभव अमूल्य आहे. ऋतू बदल घडत असताना निसर्गातील मनोहरी विभ्रम आपल्याला या परिसरात पहायला मिळतात. सकाळचा सूर्योदय आणि संध्याकाळचा सूर्यास्त याची मजा तर काही औरच. एकंदरीत या सर्वांमुळे तनमन प्रसन्न होते; चित्तवृत्ती फुलून येतात. आणि आता तर ऋतूंचा राजा वसंत याचे राज्य सुरू आहे. मागील आठवड्यात सकाळच्या वेळी फेरफटका मारताना आंब्याच्या झाडांवरील मोहोर दृष्टीस पडला आणि मन मोहरून गेले. मोबाईल मधून पटकन हे दृश्य टिपलं. आणि नंतर काव्य ओळी सुचल्या ते शब्दबद्ध करण्याचा हा प्रयत्न .
सृजनाचा मोहोर
सृष्टी ऋतुचक्र अविरत
अर्थ उलगडून उमजून घ्यावा सतत ...
सृ सृष्टीचा
सृ सृजनाचा
च चैत्राचा चराचरातील चैतन्याचा
पानगळीपासून पालवीच्या प्रवासाचा
ध्यास मनीचा
निसर्गातील संगीत दैनंदिन अनुभवण्याचा
गतीतून प्रगती साधण्याचा
व्यष्टी आणि समष्टी परस्परपूरक होण्याचा
उन्नततेची गुढी उंचच उंच उभारण्याचा
प्रेयसाकडून श्रेयसाकडं जाण्याचा.....
टिप्पण्या
यांचे ऋतुचक्र मध्ये ऋतू बदलाची लालित्यपूर्ण वर्णने आहेत विशेषतः कालिदासाचे वसंत आणि ग्रीष्म ऋतूचे वर्णन नितांत सुंदर आहे
तुम्ही तोच धागा पकडून एक छान ललीत लेख लिहिला आहे आंब्याचा
मोहर कोकिलेचे कूजन जाई जुई
मोगरा यांचा धुंद करणारा सुवास ही
वसंत ऋतूच्या आगमनाची सूचना देतात
तुमच्या लेखात हे सर्व जुईच्या सुगंधासारखे आले आहे
अशोक आफळे
आशयघन आहे नाद लय आणि ताल सांभाळून आशयघनता जपणे खूप
कठीण असते पण तुम्ही ते सह जपणे
जमविले आहे कारण जागेवर सुचलेले
हे उस्फूर्त काव्य आहे
अशोक आफळे
अनिल पाठक